|
Nina, sentadi a
l'osto,
col ciaro che se spande
da i to oci de sòlfaro,
el mondo el par più picolo
el piato el par più grande,
e tuta una rosaria
dei bei palassi in aria,
spiuma e spiansisa su...
E la tovaia bianca
la par n'altar de ciesa...
Guarda castei de sucaro,
guarda primissie - sfòghete
qualunque sia la spesa...
Vegnia botilie fine,
carghe de teraine
che el tempo el gha trà su!
Ma se davanti ai veri,
co una fame gaiarda,
trista, malada, stupida
a fermarse se àldega
'na testa che te guarda,
e sensa che s'el creda
par che 'na roba freda
ne sia sbrissià sul cor....
E su, su da le caneve
dove i pitochi stenta,
zo dai granari umidi
dove su veci mobili
sgossa zo l'acqua e sventa
par che ne ariva un sigo,
'na specie de castigo
in forma de dolor...
Me vien subito in mente
la gente maltratada:
done che suda lacrime,
fioi che tol su,sfamandose,
tochi de pan par strada:
veci che çerca un leto
sui scalini del gheto,
par non sveiarse più!
Se smorsa in quel momento
el ciaro, che se spande
da i to oci de sòlfaro...
El piato el par più picolo,
el mondo el par più grande,
e tuta sta agonia
me fa malinconia,
un gropo me dà su.....
- Nina, a la tratoria
non te conduso più!
|